Colaboración ONCE e RAG

Seccións: Actividades
convenio_rag_firma_0.jpg

 Ambas as institucións formalizaron un protocolo de colaboración ao abeiro do cal se comprometen a traballar para incrementar a oferta bibliográfica en galego dispoñible tanto en Braille como en versión sonora.  O acordo foi asinado na sede da Real Academia Galega polo seu presidente, Víctor F. Freixanes, e o delegado territorial da ONCE en Galicia, Manuel Martínez Pan.

 A RAG e a ONCE colaborarán para fornecer as persoas cegas e con discapacidade visual severa dos recursos lingüísticos e técnicos necesarios para se expresar integramente, oralmente e por escrito, en galego. Este é un dos compromisos que se establecen no protocolo de colaboración entre ambas as institucións que asinaron o 12 de novembro na sede da Academia o presidente da RAG, Víctor F. Freixanes, e o delegado territorial da ONCE en Galicia, Manuel Martínez Pan. O acordo permitirá tamén traballar de forma conxunta en todo tipo de proxectos culturais de interese común encamiñados ao fomento e promoción da lingua e da cultura galegas, e procurará, en definitiva, máis espazos de uso para o galego entre as persoas afiliadas á ONCE.

A ONCE leva oito décadas prestando servizos a persoas cegas e con discapacidade visual severa e traballando a prol da súa inclusión social e laboral,  facilitando así  o pleno exercicio dos seus dereitos. O protocolo asinado hoxe na Coruña profunda neste obxectivo, porque “a lingua e a cultura galegas forman parte deses dereitos de cidadanía”, salientou o presidente da Academia, que lembrou que o Rexurdimento contou entre as súas figuras máis destacadas cun invidente, o xornalista Valentín Lamas Carvajal. “Hoxe damos, da man da RAG, un importante paso para potenciar o uso e o coñecemento da nosa lingua entre a comunidade de persoas cegas e con discapacidade visual severa”, subliñou o delegado territorial da ONCE.

Imaxe dos asinantes do acordo posando para os fotógrafos na Sala da RAG

 

A lingua é un código de comunicación e de socialización que atinxe a toda as persoas, unha implicación global pola que vela este protocolo. “Non hai cidadáns de primeira e cidadáns de segunda. Responsabilidade de institucións como a ONCE ou a RAG é dar resposta ás necesidades e demandas de todas as persoas, incluídas aquelas que por calquera discapacidade teñen dificultades para acceder á cultura, ou dito doutra maneira: ao desenvolvemento pleno da súa personalidade e das súas capacidades, en pé de igualdade con calquera outra persoa”, expresou Víctor F. Freixanes. Con este propósito, ambas as institucións pretenden traballar conxuntamente para atender a crecente demanda das persoas invidentes de textos en galego, literarios e non literarios, textos técnicos e científicos, ou simplemente de lecer.

“Veremos mellorado de forma significativa o acceso á cultura galega no idioma propio da nosa terra ao aumentar a oferta bibliográfica en galego, tanto en versión Braille como en versión sonora”, detallou Manuel Martínez Pan. O incremento da oferta de libros en galego para persoas con discapacidade visual é asemade unha maneira máis de incorporar o idioma galego á plena normalidade, que pasa por poñelo a disposición de sectores da sociedade que o demanden e poidan enriquecerse coa súa práctica e coñecemento.

Publicador de contidos

Calendario

  1. L
  2. M
  3. M
  4. X
  5. V
  6. S
  7. D
  8. 1
  9. 2
  10. 3
  11. 4
  12. 5
  13. 6
  14. 7
  15. 8
  16. 9
  17. 10
  18. 11
  19. 12
  20. 13
  21. 14
  22. 15
  23. 16
  24. 17
  25. 18
  26. 19
  27. 20
  28. 21
  29. 22
  30. 23
  31. 24
  32. 25
  33. 26
  34. 27
  35. 28
  36. 29
  37. 30
Eventos do mes
Non hai eventos para este mes

Subscrición

Subscrición

Suscríbete al boletín de Noticias ONCE de la Comunidad de Galicia
Informámosche de que os datos de carácter persoal que nos proporciones ao encher o presente formulario serán tratados por Política privacidade

Publicador de contidos