Sentir o Mar en Muros

O sábado 15 de decembro a localidade de Muros foi e a protagonista dunha experiencia realizada coa colaboración da Consellería do Mar e a ONCE, que permitíu a un grupo de afiliados  achegarse ao mar cos sentidos. A actividade, que xa se fixo en Marín no mes de xuño,   deriva da  publicación dun traballo realizado por un equipo de profesionais do ámbito educativo e social e demostra distintas formas de vivir o mar para as persoas invidentes.

Un proxecto, sen dúbida, “concibido co espírito de superar barreiras e que alberga a excelencia educativa”, segundo indicou a conselleira do Mar, Rosa Quintana, durante a  presentación do libro previa á viaxe nos barcos, e na que tamén particiou o director do CRE de Pontevedra, José Ángel Abraldes.

O proxecto involucra a profesores, estudantes e familias, xa que é unha ferramenta de apoio para eles. Deste xeito, os participantes fixeron da navegación tradicional unha nova actividade de ocio segura e atractiva. A iniciativa Sentir o mar é “un recurso pedagóxico que se compón de experiencias vitais, consellos e boas prácticas”.
Ademais da guía, esta iniciativa comprende exercicios de navegación en embarcacións previamente formadas de xeito específico, como o que se realizou en Muros trala presentación da publicación. Nestes exercicios preséntase a descrición gráfica do barco e a nomenclatura das súas partes en braille co apoio de elementos como unha maqueta a tamaño escala, que reproduce todos os detalles do barco, permitindo a familiarización dos novos navegantes, e unhas láminas realizadas en papel microcápsula en relevo que facilita a súa exploración na propia embarcación.

Estas xornadas inclúen tamén unha visita guiada polo barco previa á navegación. É o exercicio máis realista e persoal, que  axuda a xerar a sensación de seguridade necesaria para realizar manobras.  Para poder levar a cabo a actividade,  semanas antes da súa posta en práctica o técnico especialista do  CRE da ONCE de Pontevedra, Jaime Domínguez Tojo, impartíu información e formación teórica e práctica entre os patróns e mariñeiros dos barcos que tomaron parte na actividade.